‘Izaki Bizidun Berriak’ izeneko diskoa kaleratu berri du Mikel Urakenek. Oraingoan taldearekin dator, alboan ditu Gorka Pardo eta David Tobal. Esperimentazio kantuak, doinu errepikakorrak eta potentzian gora eta behera egiten duten abestiak dira nagusi. Hasieratik bilakaera argia izan du Urakenek. Gitarra akustikoarekin aritzen zen hasieran, doinu folkiak eginez. Orain berriz doinu ilunagoetara jo du bilbotarrak.
